काभ्रेपलाञ्चोक जिल्ला सहकारी क्षेत्रको उर्बर जिल्लाको रुपमा रहेको छ । बचत तथा ऋण सहकारी संस्थाहरुको सूचिमा राष्ट्रिय तथा अन्तराष्ट्रिय स्तरमा पहिचान बनाउन सफल धेरैवटा सहकारी संस्थाहरु यसै जिल्लामा रहेका छन् । बचत तथा ऋण सहकारी संस्थाहरुको बृद्धि र विकासमा काभ्रेपलाञ्चोक जिल्ला बचत तथा ऋण सहकारी संघ लि. को भूमिका त्यतिकै महत्वपूर्ण रहेको छ । संघले सञ्चालन गरेको अन्र्तलगानी कार्यक्रमले साकोसहरुलाई निर्धक्कसँग बचत तथा ऋणको कारोबार गर्न प्रेरित गरेको छ । संघले जिल्ला भित्रका सहकारी संस्थाबाट लगानी हुने ऋणको गुणस्तरियता कायम गर्न सञ्चालन गरिरहेको ऋण सूचना केन्द्र कार्यक्रमलाई प्रभावकारी रुपमा अगाडी बढाउनु जरुरी रहेको महशुस गरेको छु । आफ्ना सदस्य संस्थाहरुको मानव संसाधनलाई तालिम तथा शिक्षाको माध्यमबाट प्रतिस्पर्धि बनाउन संघले गरेको क्रियाकलापहरु प्रशंसनीय रहेको छ । वित्तीय रुपमा पनि संघ सवल र सक्षम रहेको पाएको छु । सहकारी ऐन, नियमावलिहरुको पूर्ण पालना गर्दै सदस्य संस्थाहरुलाई अधिकतम शेयर लाभांश र संरक्षित पुँजि फिर्ता कोष समेत वितरण गर्न सफल काभ्रेपलाञ्चोक जिल्ला बचत तथा ऋण सहकारी संघको थप प्रगतिको शुभकामना ब्यक्त गर्दछु । गुणस्तरिय सहकारी संस्था निर्माण गर्न त्यसबाट उपलब्ध सेवाहरु पनि गणस्तरिय नै हुन जरुरी छ । हाल सहकारी क्षेत्रमा रोजागारीको अवसर प्रशस्त रहेको र आकर्षण पनि बढ्दै गएको छ । तर सक्षम मानव संशाधनको अझै अभाव भएको महशुस गरेको छु संघले आवश्यक मानव संशाधन तयार गर्न विभिन्न तहका तालिम तथा कक्षाहरु सञ्चालन गरी गुणस्तरिय मानव संशाधन तयार गर्ने तर्फ ध्यान दिन अनुरोध गर्दछु ।